Il n'est point tant de barques à Venize
Mellin De Saint Gelais

Il n'est point tant de barques à Venize,
D'huystres à Bourg, de festuz en Champagne,
De differentz aux peuples d'Allemagne,
De cygnes blancz au long de la Tamise ;

Ne tant d'amours se traictent en l'eglise,
Ne tant de veaux se treuvent en Bretagne,
Ne tant de gloire en un signor d'Espagne,
Ny en la Court tant y a de faintise ;

N'en ces Anglois a tant de cornardise,
Ne de pardons à Rome un jour de feste,
Ny d'usuriers en toute Lombardie ;

Ny de travaulx à vaincre femme honneste,
Ne dans Auvergne animaulx d'Arcadie,
Que vous avez de lunes en la teste.

   Mellin De Saint Gelais